E accussì se chiammaje Quisisana!

Dint a 'nu bosco,
dint a 'na reggia
ce steva 'nu Re a capo 'e 'nu gregge,
'nu gregge fatto 'e popolo,
'e marenare,
gente ca campava cu pochi denare.

'Stu Re teneva sempre che ffà
e nun se ne 'mpurtava da' realtà,
nun se ne 'mpurtava 'e niente e nisciuno
e mai niente 'o puteva fa' 'ntussecà.

Mangiava, beveva
e nun sapeva niente 'e 'sta città,
niente do' paese suojo,
'e chilli suddite ca era bbuono sulo a cummannà.

Tutte quante stevene a disposizione soja,
'o servivano e 'o riverivano
comme se fa' cu Ddijo,
quaccuno 'o faceva pe' macchiavelleria
e quaccuno pe' galanteria,
ma 'na cosa è sicura,
'e 'stu Re tutte tenevene paura.

Se faceva arrispettà pure de' mosche,
pure da' Luna e do' Sole
ca vicino a isso nun erano nisciuno.

'Nu juorno, tutto assieme
'stu Re se ammalaje
e a faccenda era grave,
perfino 'a gente do' paese diceva
«È muorto 'o RE! È muorto 'o Re!»
e tutte currevene 'o palazzo
pe' avè nutizie 'e chistu fatto.

«È muorto 'o Re! È muorto 'o Re!» alluccavane,
erano nutizie certe, nutizie sicure.

All'indrasatto, quanno 'o Re era spacciato
arrivaje 'nu duttore assaje priparato
e cu 'na purzione,
cu nu miscuglio,
facette 'o miraculo 'a bello 'e bbuono.

E 'a gente alluccava
«È salvo 'o Re! È salvo 'o RE!»
senza sapè 'o comme
e senza sapè 'o pecchè.

'Nu juorno, aroppe ca era stato bbuono,
'o Re ascette fore a piglià 'nu poco d'aria
e penzanno a chello ca aveva fatto dint' 'a vita,
chella vita ca steve perdenno,
dicette: «Da oggi sarò io a rispettare gli altri
e non gli altri rispettare me!»

e po' pigliaje 'nu respiro profondo
e dicette: «Qui si sana!»
e 'o dicette sentenno l'aria bbona.

E accussì, a chella frase 'mpruvvisata
nascette 'o nome Quisisana.

Dint a 'nu bosco,
dint a 'na reggia
ce steva nu Re a capo 'e 'nu gregge,
'nu gregge fatto 'e popolo,
'e marenare,
gente ca campava cu pochi denare.