'A storia 'e 'nu criaturo!

Era vierno,
faceva friddo,
faceva 'a neve,
quanno a Betlemme
nascette 'stu nennillo.

Nisciuno 'o sapeva,
nisciuno 'o ccredeva
ca steva arrivanno 'o Salvatore,
pure sì quaccosa 'o ddiceva,
dint' 'a ll'aria se sentiva già ll'addore.

'Na stella lucente chiammaje a tre Signure,
tre furastiere ca sapevano 'a verità,
ca sapevano 'a nutizia
e accussì se mettetteno 'ncammino
pe' vedè 'a vicino 'stu dono d' 'o Signore.

Pure Essa 'o sapeva
ca 'ncuorpe teneva
chi 'o munno puteva salvà;

ci' 'o ddicette n'angelo,
ca steva succedenno 'a cosa cchiù bella,
'e dà 'a vita a chi a nuje c'ha dato 'a vita.

Era vierno,
faceva friddo,
faceva 'a neve,
quanno a Betlemme
nascette 'stu nennillo.

Stanche e muorte 'e friddo
'e dduje puverielli camminavano pe' truvà n'aiuto,
visto ca 'o mumento s'avvicinava
e ca chell'anema 'e Ddijo vuleva vedè 'a luce.

E accussì truvaino riparo dint' 'a 'na stalla
cu dduje animale ca parevano capì
e cu' 'o sciato lloro
scalfaino chell'aria fredda
pe' accogliere 'o Re d' 'o munno.

E finalmente succedetto,
nascette 'stu criaturo,
ca comme 'a ll'ate
'na vita 'e male e bene ll'aspettava,
ma isso era speciale,
era 'o figlio d' 'o Signore.