Chi cchiù ne tene…

Prima ‘o fatto era semplice…
pe’ nu paro ‘e scarpe
dduje pullastri e ‘nu sacco ‘e farina,
pe’ nu fiasco ‘e vino
bastava ‘na caciuttella.

Po’ quaccuno perdette ‘e siensi
e vulette ‘nventà ‘e denari!
Ma chi è stato ‘stu pazzo
ca è fatto ‘sta bella penzata?
Chella matina nun teneva che ffà?

E ormai ‘o danno è fatto,
chi cchiù ne tene cchiù ne vo tenè!
Ormai nun se riesce cchiù a capè
ca ‘e cose belle nun se ponno accattà,
nun se ponno truvà dint’ ‘a ‘na vetrina
addubbate e ‘mpacchettate.
‘E soldi so’ peggio ‘e ‘na malatia
e comme se dice?
‘O sazio nun crede ‘o diuno!
Chi ha avuto sempre tutto d’ ‘a vita
nun po’ capè ‘a chi addesidera ‘nu muorzo ‘e pane,
chi nun sape che è ‘a felicità.

Ma po’ ‘e soldi so’ felicità?
Oddio, è pure overo ca chi nun ‘e tene
certo nun s’addiverte!!!

Ma chi è stato chillo pazzo?
Ma chi c’ha fatto fa’?